ຄວາມ ຮັກ... ຈະວ່າເປັນເລື່ອງ "ງ່າຍ" ມັນກໍງ່າຍ ຈະວ່າເປັນເລື່ອງ "ຍາກ" ມັນກໍຍາກ ຢູ່ທີ່ວ່າເຮົາຈະມອງມັນດ້ວຍສາຍຕາແບບໃດ ຂໍຢ່າງດຽວ "ຢ່າໄປເຮັດໃຫ້ເລື່ອງງ່າຍໆ ກາຍເປັນເລື່ອງຍາກໆ" ກໍພໍ
ຢ່າໄປຄິດເອງເອີເອງວ່າ ຄົນເປັນແຟນກັນຕ້ອງຮູ້ທຸກເລື່ອງທີ່ເປັນເລື່ອງຂອງເຂົາ ມັນບໍ່ແມ່ນດອກ!! ຍິ່ງເຮັດແນວນັ້ນ ກໍເໝືອນຍິ່ງທຳລາຍເກາະຄວາມຜູກພັນໃຫ້ຍິ່ງບາງລົງໆ ບໍ່ມີໃຜຢາກຮູ້ສຶກຄືຖືກສອບສວນຕະຫລອດເວລາ ເພາະເລື່ອງນີ້ແຫລະທີ່ເປັນເລື່ອງ Top Hit ທີ່ບັນດາຄູ່ຮັກມີປາກມີສຽງກັນເລື້ອຍທີ່ສຸດ
ການ "ຈັບຜິດ" ຄົນຮັກ... ຕໍ່ໃຫ້ຈັບໄດ້ຄາໜັງຄາເຂົາ ຖາມວ່າມີໃຜ "ມີຄວາມສຸກ" ແດ່? (ຄຳຕອບຄືບໍ່ມີໃຜມີຄວາມສຸກຈັກຄົນ) ເພາະສະນັ້ນ... ລອງຊັ່ງໃຈຕົວເອງເບິ່ງດີໆ ວ່າ ຖ້າເຮົາຍອມຮັບນິໄສບາງຢ່າງຂອງເຂົາໄດ້ ເຊັ່ນ ນິໄສຜູ້ຊາຍທີ່ຕ້ອງມີການເບິ່ງແມ່ຍິງອື່ນນຳ ກໍບໍ່ແມ່ນເລື່ອງໃຫຍ່ໂຕ ຫາກເຂົາຍັງບໍ່ໄດ້ຫອບເຄື່ອງໄປຢູ່ກັບຍິງອື່ນ ເບິ່ງແງ່ດີກໍຄື ເຂົາກໍຍັງຮັກເຮົາ ແລະເລືອກທີ່ຈະຢູ່ກັບເຮົາ ເຮົາຕ້ອງຖາມຕົວເອງແລ້ວວ່າ "ລະຫວ່າງຄົນທີ່ເຂົາເລືອກຈະຢູ່ນຳ" ກັບ "ຄົນທີ່ເຂົາເລືອກຈະເວົ້ານຳຊື່ໆ" ເຮົາຢາກເປັນຄົນໃດ?
ຖ້າຢາກເປັນຄົນທີ່ເຂົາເລືອກຈະຢູ່ນຳ ສິ່ງທຳອິດທີ່ຕ້ອງກັກຕຸນເອົາໄວ້ຫລາຍໆ ກໍຄື "ຄວາມເຂົ້າໃຈ" ພະຍາຍາມເບິ່ງບາງເລື່ອງໃຫ້ເປັນເລື່ອງນ້ອຍໆ ຢ່າປ່ອຍໃຫ້ເລື່ອງນ້ອຍໆ ນັ້ນມາກະທົບກັບການດຳເນີນຊີວິດຂອງເຮົາເລີຍ ເພາະໂຈດບາງຢ່າງໃນເລື່ອງຂອງຄວາມຮັກມັນບໍ່ໄດ້ມີຫຍັງ "ຍາກເກີນໄປ" ເລີຍ "ຄົນ" ຕ່າງຫາກທີ່ເຮັດໃຫ້ມັນຍາກ
ຢ່າມົວໄປຄົ້ນຫາຂໍ້ເສຍໃນຕົວຄົນອື່ນໃຫ້ວຸ້ນວາຍ ເພາະສິ່ງທີ່ຄົ້ນພົບ (ບໍ່ວ່າຈະເລື່ອງເຂົາໂທຫາໃຜ, ໄປໃສມາແດ່, ກັບຜິດເວລາເລື້ອຍໆ) ມັນຈະກາຍເປັນເລື່ອງຂາດຄ່າທັນທີ ຫາກຈິດໃຈເຮົາຍັງບໍ່ນິ່ງພໍທີ່ຈະຍອມຮັບວ່າທຸກຢ່າງ ມັນກໍເປັນຈັ່ງຊັ້ນເອງ ກາຍເປັນວ່າບໍ່ຮູ້ກໍທຸກ ຍິ່ງສືບຍິ່ງຮູ້ຫລາຍ ກໍຍິ່ງທຸກໜັກເຂົ້າໄປອີກ ແລ້ວຈັ່ງຊີ້ເມື່ອໃດຈະຮູ້ຈັກກັບຄຳວ່າ "ຄວາມສຸກ" ໄດ້ແທ້ໆ ນຳເຂົາຈັກເທື່ອ
ເລື່ອງງ່າຍທີ່ສຸດທີ່ຢາກຈະແນະນຳເວລາແຟນເຮັດຫຍັງບໍ່ຖືກໃຈເຮົາກໍຄື ຄິດເສຍວ່ານິໄສເຂົາມັນແກ້ບໍ່ໄດ້ດອກ ເພາະຄົນເຮົາເຕີບໂຕແລະຖືກລ້ຽງດູມາຕ່າງກັນ ຖ້າເຮົາຮຽນຮູ້ແລະເຝິກແອບທີ່ຈະເຂົ້າໃຈເຂົາ ວ່າເຂົາກໍເປັນແບບນີ້ແຫລະ ມັນຈະງ່າຍກວ່າຫລືບໍ່ ບາງທີເຮົາຄວນຮຽນຕອບຄຳຖາມຕົວເອງໃຫ້ໄດ້ວ່າ "ເປັນຫຍັງເຮົາຮັກຜູ້ຊາຍຄົນນີ້ ທີ່ມີທັງຂໍ້ດີແລະຂໍ້ເສຍໆ ກັນໄດ້" ຄຳຕອບທີ່ເຮົາຕອບຕົວເອງເທື່ອນີ້ ອາດເປັນຄຳພີຫລືເຂັມທິດທີ່ຈະກຳນົດທິດທາງຄວາມຮັກຂອງເຮົາໄດ້ຢ່າງແມ່ນຍຳ ໝັ່ນກວດເບິ່ງຕົວເອງນຳກໍດີ ວ່າເຮົາເຂົ້າໃຈແຟນເຮົາໄດ້ໃນລະດັບໃດ? ເຮົາເຄີຍໃຫ້ກຽດເຂົາໃນເລື່ອງສ່ວນຕົວຂອງເຂົານຳບໍ ຫລືແຕ່ລະມື້ເອົາແຕ່ຄອຍກວດອີເມລ, ກວດໂທລະສັບ, ເຊັກ hi5, ເຊັກເຟສບຸ໊ກ ສາລະພັດຊ່ອງທາງຈະເຊັກ ເຊັກ ເຊັກ!!!!! ພໍເຊັກສຳເລັດ ບາງຄົນເປັນລົມຄາຄອມພິວເຕີໄປເລີຍກໍມີ
ຢ່າເຮັດໃຫ້ຕົວເອງລຳບາກເຖິງຂະໜາດນັ້ນເລີຍ ເລື່ອງຫຍັງທີ່ເບິ່ງຂ້າມໄປໄດ້ ກໍຈົ່ງເບິ່ງຂ້າມມັນໄປ. ເລື່ອງບາງເລື່ອງມັນກໍເກີດຂຶ້ນງ່າຍໆ ແລ້ວກໍຈົບໄດ້ງ່າຍໆ ຄືກັນ ແຕ່ຖ້າເຮົາໄປເຮັດໃຫ້ມັນຈົບຍາກເສຍເອງ... ຄາວນີ້ຈະໄປໂທດໃຜໄດ້ ຖ້າບໍ່ແມ່ນຕົວເຮົາເອງ
No comments:
Post a Comment